സയൻസ് ഫിക്ഷന്റെ പിതാവ് എന്ന് വിശേഷിപ്പിക്കപ്പെടുന്ന ഷൂൾസ് വേണിന്റെ വിസ്മയകരമായ നോവൽ. സമുദ്രത്തിനടിയിലുള്ള നിഗൂഢലോകങ്ങളിലൂടെയുള്ള ഒരു യാത്ര എന്ന നിലയിലാണ് ഈ നോവൽ എഴുതിയിട്ടുള്ളത്. ഒരു കടൽ രാക്ഷസൻ പ്രത്യക്ഷപ്പെട്ടിട്ടുള്ളതായി പല രാജ്യങ്ങളിൽ നിന്നും റിപ്പോർട്ട് വരുന്നു. സമുദ്രത്തിലെ ആ രാക്ഷസനെ പിടികൂടി നശിപ്പിക്കുകയെന്ന ലക്ഷ്യത്തോടെ ഒരു സംഘം പുറപ്പെടുകയാണ്. പ്രൊഫസർ പിയറി ആരോനാക്സ് ആണ് സംഘത്തിന്റെ നായകൻ. ഫ്രഞ്ചുകാരനായ മറൈൻ ബയോളജിസ്റ്റാണ് പിയറി. പ്രൊഫസർ പിയറി ആരോനാക്സ് കഥ പറയുന്ന രൂപത്തിലാണ് നോവലിന്റെ ആഖ്യാനം.